أطالب بحقي في إغتصاب النساء (فيديو)

كيف أغلب التّوانسة اللي عندهم فايسبوك، قمت الصّباح نلقى الفيديو هذا في وجهي، بعنوان ‏أطالب بحقي في إغتصاب النساء!!! ‏.. الفيديو، بما أنّو طولو 37 ثانية كهو، وبما أنّو السيّد اللي يتكلّم فيه وجه مألوف في فايسبوك وفيديواتو في العادة يدومو أكثر من 5 دقايق، كان من الطّبيعي أنّي نفهم اللي الفيديو مقصوص لغاية في نفس اللي قصّوه.










اللي قصّوا الفيديو حبّوا يضربوا 3 عصافر بحجرة، وهذا الكلام اللي حطّوه في وصف المقطع اللي هبّطوه بعد ما حجّمولو.. الثلاثة عصافر أهوكم ملوّنين:

"هذا الحيوان النهضاوي(حاشا الحيوان) تابع لإتحاد صفحات الثورة بقيادة مفرخة الحقائق الخفية و المدافع الرسمي متاع حركة النهضة. آخر طلعة متاع هاذا السافل الحقير قلك لازم تعطوني الحق باش نغتصب البنات إلي لابسين لبسة عريانة (مش متحجبة ولا لابسة سروال محزوق ولا بودي مكبوس...إلخ)."

وبما أنّي ما فهمتش آش مجيّب توفيق الغضبان (صاحب صفحة لا حرّيّة إلاّ برحيل التجمّع الدستوري الدّيمقراطي، والمتكلّم في الفيديو) لصفحة الحقائق الخفيّة وآش مجيّب النّهضة لإتّحاد صفحات الثّورة (اللي واحد من أدميناتها تصوّر وهوّ حاطط قدّامو حكّة سلتيا ومن بعّد اعتذر في فيديو)، قلت برّا نمشي نلوّج على الفيديو الأصلاني لعلّ نفهم حاجة..

حاصيلو من غير ما نزيد نكتب باش ما نولّيش نلعبلكم بمخاخكم كيف الجّماعة اللي قصّوا الفيديو، هاو الفيديو الأصلاني قدّامكم (عنوانو هوّ أين حقوق المرأة التّونسيّة):





والسّلام عليكم ورحمة الله وبركاته